कोल्हापूर, दि. 12: भारत सरकार मॅट्रीकोत्तर शिष्यवृत्ती योजनेंतर्गत महाविद्यालयांनी आपल्या महाविद्यालयातील मागासवर्गीय विद्यार्थ्यांचे शिष्यवृत्तीचे अर्ज भरून घेण्याबाबत तात्काळ कार्यवाही करावी. सन 2020-21 हे आर्थिक वर्ष संपण्यास काही दिवसांचा कालावधील शिल्लक असल्याने अर्ज तात्काळ ऑनलाईन प्रणालीतून सहाय्यक आयुक्त समाज कल्याण कार्यालयाकडे वर्ग करण्याचे आवाहन समाज कल्याण विभागामार्फत करण्यात आले आहे.
भारत सरकार मॅट्रीकोत्तर शिष्यवृत्ती योजनेंतर्गत अनुसूचित जाती, विजाभज, इमाव व विमाप्र प्रवर्गातील विद्यार्थ्यांसाठी https://mahadbtmahait.gov.in या संकेतस्थळावर शिष्यवृत्तीचे अर्ज भरण्यासाठी 3 डिसेंबर 2020 पासून सुविधा उपलब्ध करून दिली आहे. सन 2019-20 या शैक्षणिक वर्षात जिल्ह्यातील एकूण 41 हजार 370 विद्यार्थ्यांनी या संकेतस्थळावर शिष्यवृत्ती अर्जासाठी नोंदणी केलेली होती. तथापि सन 2020-21 या आर्थिक वर्षात आजअखेर केवळ 22 हजार 779 मागासवर्गीय विद्यार्थ्यांनी अर्ज भरलेले असून त्यापैकी 18 हजार 199 अर्ज संस्था स्तरावर प्रलंबित असल्याचे दिसून येते.
