संकेश्वर- आंबोली राष्ट्रीय महामार्ग करताना शेतकऱ्यांना विश्वासात घ्या : आमदार हसन मुश्रीफ यांच्या राष्ट्रीय महामार्ग प्रशासनाला सूचना

गडहिंग्लज, दि. २४:संकेश्वर – गडहिंग्लज- आजरा- आंबोली हा राष्ट्रीय महामार्ग बांधताना शेतकऱ्यांना विश्वासात घ्या, अशा सूचना आमदार हसनसाहेब मुश्रीफ यांनी दिल्या. राष्ट्रीय महामार्ग प्रकल्पाच्या अधिकाऱ्यांसह प्रांताधिकारी, तहसीलदार यांनी शेतकऱ्यांच्या मनातील शंकांचे निरसन करावे, असेही त्यांनी सांगितले.
गडहिंग्लजच्या तहसील कार्यालयात शेतकरी प्रतिनिधी, महसूल प्रशासन आणि राष्ट्रीय महामार्ग प्रशासनाबरोबर बैठक झाली.
बैठकीत आमदार श्री. मुश्रीफ म्हणाले, हा रस्ता बीओटी तत्त्वावर बांधला जात नसून तो केंद्र सरकारच्या निधीमधून होणार आहे. गडहिंग्लज तालुक्यातील चार गावांच्या हद्दीतील सव्वा किलोमीटरचे भूसंपादन होणार आहे. आजरा तालुक्यातील अकरा गावांच्या हद्दीतील साडेसहा किलोमीटरचे भूसंपादन होणार आहे. गडहिंग्लज शहरांमधून तो दहा मीटरने काँक्रिटीकरण, दोन्ही बाजूला साडेचार मीटरने डांबरीकरण व गटारी या मापानुसार जाणार आहे. केंद्र सरकारच्या भूसंपादनाच्या नियमानुसार जमिनीची भरपाई मिळणार आहे.
बाधित शेतकऱ्यांच्यावतीने कॉम्रेड संपतराव देसाई, रामगोंडा पाटील यांनी मांडलेले मुद्दे असे…….
महापुराचे पाणी रस्त्यावर येत असलेल्या ठिकाणी रस्त्याची उंची वाढवा. नवीन रस्त्याची स्पष्टता दर्शविणारा नकाशा गावचावड्यांवर लावा. कोणाचे किती क्षेत्र जाणार आहे, याची नेमकी अधिसूचना गावचावड्यांवर जाहीर करा. तुटलेल्या झाडांच्या बदल्यात भौगोलिक वैविधतेनुसार वृक्षारोपण करा. जमीन संपादन करताना रस्त्याच्या दोन्ही बाजूची मोजणी होऊन संबंधित शेतकऱ्यांना माहिती द्या. मोजणी करताना तोडलेल्या झाडांची नोंद घ्या. रस्त्यावर होणाऱ्या टोल नाक्यांवर स्थानिक वाहनांना सूट द्या व तिथे बाधित शेतकऱ्यांच्या मुलांना कामावर घ्या.
“केंद्रीय मंत्री नितीनजी गडकरींकडे पाठपुरावा करू……….”
बैठकीत आमदार श्री. मुश्रीफ म्हणाले, शेतकऱ्यांची टॅगिंग न केलेली झाडे तोडली असतील तर त्यांची भरपाई तसेच भूसंपादनामध्ये जास्तीत -जास्त भरपाई या संदर्भात केंद्रीय रस्ते वाहतूक मंत्री नितीनजी गडकरी यांना भेटून शेतकऱ्यांच्या समस्या आणि मागण्यासंदर्भात पाठपुरावा करू.
यावेळी झालेल्या चर्चेमध्ये कॉम्रेड संपतराव देसाई, केडीसीसी बँकेचे संचालक सुधीर देसाई, भारतीय किसान संघटनेचे रामगोंडा पाटील, प्रकाश मोरुस्कर, सिद्धार्थ बन्ने, दयानंद खन्ना, अमरनाथ घुगरी, उमेश मोहिते, राजू मोळदी, अशोक कमते, प्रांताधिकारी बाबासाहेब वाघमोडे, राष्ट्रीय महामार्ग प्रकल्पाचे कार्यकारी अभियंता श्री. मुधाळे, भूसंपादनचे उपजिल्हाधिकारी विवेक काळे, गटविकास अधिकारी शरद मगर, तहसीलदार दिनेश पारगे नगरपालिकेचे मुख्याधिकारी स्वरूप खारगे आदींनी सहभाग घेतला.