Mirror Kolharpur
पेट्रोलियम आणि नैसर्गिक वायू मंत्रालयाने (MoPNG) देशभरातील स्थलांतरित कामगार आणि गरजू लोकांसाठी स्वयंपाकाचा गॅस सहज आणि स्वस्त दरात उपलब्ध करून देण्यासाठी महत्त्वपूर्ण निर्णय घेतला आहे. ५ किलोच्या छोट्या ‘फ्रि ट्रेड एलपीजी’ (FTL) सिलेंडरच्या उपलब्धतेत मोठी वाढ केली आहे.
पेट्रोलियम आणि नैसर्गिक वायू मंत्रालयाने एक महत्त्वपूर्ण पाऊल उचलले आहे. ७ एप्रिलपासून सर्व राज्ये आणि केंद्रशासित प्रदेशांसाठी सिलेंडर पुरवठ्यावरील निर्बंध काढून टाकण्यात आले आहेत. आता ५ किलोच्या सिलेंडरचा दैनंदिन पुरवठा दुप्पट करण्यात आला आहे. मार्च महिन्यातील वाढती मागणी लक्षात घेता हा निर्णय घेण्यात आला. यामुळे विशेषतः शहरी तसेच निमशहरी भागातील गॅस टंचाई दूर होण्यास मदत होणार आहे.
सर्वसामान्यांसाठी गॅस मिळविण्याची पद्धत आता अधिक सोपी करण्यात आली आहे. ५ किलोचा सिलेंडर घेण्यासाठी कायमस्वरूपी पत्त्याच्या पुराव्याची आता गरज भासणार नाही. ग्राहक फक्त आधार कार्ड किंवा पॅन कार्ड आणि एक स्वयं घोषणापत्र देऊन हा सिलिंडर घेऊ शकतात. या सुविधेमुळे स्थलांतरित मजूर, रोजंदारीवर काम करणारे लोक आणि विद्यार्थ्यांना मोठा दिलासा मिळणार आहे.
पेट्रोलियम आणि नैसर्गिक वायू मंत्रालयाच्या या सुविधेला देशभरात मोठा प्रतिसाद मिळत आहे. २३ मार्च ते ९ एप्रिल २०२६ दरम्यान देशभरात सुमारे ८.९ लाख सिलेंडरची विक्री झाली आहे. ७ एप्रिल २०२६ रोजी एकाच दिवसात १.१ लाखांहून अधिक सिलिंडरची विक्री झाली आहे. आतापर्यंतची ही एक विक्रमी नोंद आहे.
याबरोबरच गॅसचा वापर वाढविण्यासाठी आणि या गॅसचा वापर सुरक्षितपणे कसा करावा? यासाठी देशभरात १,६०० हून अधिक जनजागृती शिबिरे आयोजित करण्यात आली आहेत. सदर सिलेंडर वितरण देशभरातील ग्राहकांना समान प्रमाणात उपलब्ध व्हावे यासाठी तेल विपणन कंपन्यांच्या साहाय्याने राज्य शासन काम करत आहे.
