Mirror Kolharpur
एलपीजीचा साठा करणे आणि त्यासंदर्भातील काळाबाजार कायमस्वरुपी बंद व्हावा या हेतून शासनाने अंमलबजावणी यंत्रणा अधिक बळकट केली आहे. देशातील प्रत्येक ग्राहकाला स्वयंपाकाच्या इंधनाचा सुरळीत पुरवठा करण्यासाठी शासन कठीबद्ध आहे. सुनियोजित काम आणि सुरळीत पुरवठा याकडे शासनाचा अधिक भर आहे.
सुनियोजित आणि शिस्तबध्द कामाचा भाग म्हणून, २,७०० हून अधिक तपासण्या आणि छापे टाकण्यात आले. काळाबाजार, घरगुती एलपीजीचा गैरवापर रोखणे आणि वितरण पद्धतीमध्ये पारदर्शकता वाढवणे हा या कारवाई मागील महत्त्वाचा उद्देश आहे.
सार्वजनिक क्षेत्रातील तेल विपणन कंपन्यांनी (OMCs) एलपीजी वितरकांकडे अचानक तपासणी केली. तसेच कामाचे नियोजन लक्षात घेत सुरक्षा सुव्यवस्था अधिक सक्षम केली आहे. या कडक तपासणीनंतर, २१९ वितरकांवर दंड आकारण्यात आला आहे. तसेच कायद्यानुसार तयार केलेल्या नियमांचे उल्लंघन केल्याबाबत आतापर्यंत ५६ वितरकांना निलंबित करण्यात आले आहे.
याबरोबरच, तेल विपणन कंपन्यांनी एलपीजीच्या जबाबदार वापराला चालना देण्यासाठी आणि प्रत्येक ग्राहकाला इंधनाचा पुरवठा सुरळीत व्हावा म्हणून ग्राहक संपर्क आणि जागरूकता निर्माण करण्याच्या हेतूने प्रयत्न सुरू केले आहेत. गेल्या आठ दिवसांमध्ये सुमारे ३,३०० जागरूकता शिबिरे आयोजित करण्यात आली आहेत. यामध्ये प्रामुख्याने ५ किलोच्या फ्री ट्रेड एलपीजी (FTL) सिलेंडर उपलब्धतेवर आणि वापरावर लक्ष केंद्रित करण्यात आले आहे. या मोहिमेदरम्यान ३५,८०० हून अधिक सिलेंडरची विक्री झाली. ग्राहक जागरूकतेच्या या उपक्रमामुळे स्थलांतरित आणि गरजू ग्राहकांच्या इंधन पुरवठा गरजा पूर्ण होण्यास मदत होत आहे. दरम्यान घरगुती एलपीजी पुरवठ्यावरील ताण कमी होत आहे.
देशाची एलपीजी वितरण व्यवस्था बळकट असल्यामुळे अंमलबजावणी आणि जनजागृतीचे उपक्रम राबवणे शक्य झाले आहे. घरगुती इंधन पुरवठा स्थिर असून, वितरकांकडे कोणत्याही प्रकारचा तुटवडा नसल्याचेही समोर आले आहे. ११ एप्रिल २०२६ रोजी देशभर ५२.३ लाखांहून अधिक घरगुती एलपीजी सिलेंडर वितरित करण्यात आले. जागतिक पातळीवरील परिस्थिती बदलत असतानाही सुरळीत पुरवठा व्हावा यासाठी यंत्रणा सक्षम आहे.
शासन इंधन पुरवठा यंत्रणेमध्ये नियमांची कडक अंमलबजावणी करत आहे. याच दृष्टिकोनामधून ग्राहकांचे रक्षण करणे, गॅस वितरण यंत्रणा सुरक्षित ठेवणे आणि प्रत्येकाला हक्काचे ऊर्जा संसाधन मिळवून देण्यासाठी शासन प्रयत्नशील आहे.
